Унапредување на женското здравје.
Обезбедување на соодветна и квалитетна здравствена информација која ќе им овозможи на жените да бидат подготвени да донесуваат здрави одлуки, и
Унапредување на положбата на жените во здравствениот систем, со посебен осврт кон маргинализираните групи на жени

Како ја постигнуваме целта на програмата?

-Обезбедуваме бесплатни, квалитетни и професионални здравствени совети и поддршка на жените од сите возрасти, дадени од страна на лекари специјалисти
-Вршиме проценка на состојбата со репродуктивното здравје на жените и мажите во Македонија, со посебен осврт кон младата популација.
-Го подобруваме пристапот кон здравствените услуги за Ромите, со посебен осврт кон жената Ромка.

Кои се нашите активности во рамките на програмата?

Во рамките на ЕСЕ функционира Здравствен информативен центар, преку кој нудиме:

- здравствени совети од областа на репродуктивното здравје, остеопороза, менопауза, контрацепција и совети за трудници.
- здравствени совети од областа на покачениот крвен притисок, како и за проблемите поврзани со покачени вредности на шеќер и холестерол во крвта.
- Вршиме одредување на шеќер, холестерол и триглицериди во крвта, по пат на брзи тестови
- Обезбедувме витамини, лекови и контрацептиви. Директната помош се обезбедува за жени кои финансиски се немоќни да ги набават овие препарати.
- бесплатни гинеколошки прегледи и ПАП тестови;
- бесплатни превентивни прегледи за остеопороза.

Подобрувањето на пристапот на Ромите кон здраствените услови ги реализираме преку

- Информативниот центар во Шуто Оризари кои ги информира клиентите за законската регулатива потребни за остварување на правото на здравствено осигурување и нуди директна финансиска помош за остварување на истото.

- Подготвуваме активности за подигнување на свесноста помеѓу Ромското население во Шуто Оризари, во однос на потрените услови за стекнување со здравствено осигурување.

- Активности за подигнување на свесноста помеѓу релевантните институции, во однос на потребата од мулти секторски пристап во процесот за олеснување на пристапот кон здравствените услуги кај Ромското население.

- Спроведување студија во однос на квалитетот, достапноста и пристапот на здравствените услуги и осигурување меѓу Ромското население.

Програма за работа 2006-2009, Програма: Жени и здравје

1. Женски здравствен информативен центар

Во 2004 година, во рамките на ЕСЕ се отвори Женски здравствен информативен центар, чија цел е обезбедување на бесплатна, квалитетна и веродостојна информација и советување на жените по однос на гинеколошките здравствени проблеми и остеопороза. Во текот на своето работење, дејностите на центарот се проширија, така да во центарот се нуди бесплатно мерење на шеќер, маснотии и холестерол во крв, потоа мерење на параметри во урина, како и мерење на крвен притисок. Воедно во центарот се обезбедуваат лекови, витамини и контрацептиви за клиентките на центарот
Мотото на центарот е “Зајакнувањето започнува со информација”. Поаѓајќи од нашата визија дека сите жени треба да донесуваат слободен избор по однос на нивното тело, репродукција и сексуалност – свет во кој жените ќе можат да го остварат својот потенцијал и ќе практикуваат здрави животни навики, активностите на центарот ги адресираат потребите на жените низ целиот животен циклус (од адолесценција до менопауза)

Континуирано работење на Женскиот здравствен информативен центар (информирање и советување на жените по однос на гинеколошки проблеми, општи здравствени проблеми и остеопороза, мерење на параметри во крв и урина, како и обезбедување на витамини, лекови и контрацептивни средства за клиентките на центарот)
Организирање на два јавни настани годишно, за подигање на свеста за посебните потреби на женското здравје
Активности за промоција на Женскиот здравствен информативен центар

2. Подобрен пристап на Ромската популација до здравствените услуги

Почнувајќи од 2004 година, ЕСЕ спроведува активности за подобрување на пристапот на Ромското население до здравствената заштита. Беа превземени активности на повеќе полиња, од една страна вклучувајќи едукација на здравствени работници, идни здравствени работници и активисти од невладини организации, а од друга страна, континуирано оперирање на Информативен центар во Шуто Оризари, кој нуди информации и директна поддршка за олеснување на процесот за стекнување на здравствено осигурување (преку нудење информации, упатување до релевантните институции и финансиска поддршка за обезбедување на потребната документација).

Досегашната работата на информативниот центар и другите активности ни покажаа дека регулирањето на правото за здравствено осигурување, е широка област која е круцијална во унапредување на здравјето на поединецот. Со цел да се идентификуваат проблемите со кои Ромското население се соочува во процесот на стекнување на правото за здравствено осигурување, работни експертски групи подготвија препораки за подобрување на пристапот на Ромското население до здравствената заштита.

Подготвените препораки, претставуваат основа за понатамошните активности на ова поле. Покрај континуираното оперирање на Информативниот центар, кој пружа директни услуги на Ромите, се подготви и стратешки документ за унапредување на здравствената положба на Ромите преку нивна поголема опфатеност со здравствено осигурување. Досегашната работа на ова поле укажа дека не постојат доволно податоци од следните области: опфатот на Ромското население со здравствено осигурување; пристапот на Ромите до услугите за здравствена заштита; здравствената состојба на Ромите; како и за причините кои стојат позади сите овие состојби. За таа цел се спроведе истражување, кое послужи како основа за стратешкиот документ, кој ќе биде поднесен до сите релевантни владини институции.
Активностите се спроведуваат преку:

Промовирање на критериумите за правото за здравствена заштита
Бесплатни правни и здравствени совети преку оперирање на Информативниот центар во Шуто Оризари
Квантитативно и квалитативно истражување помеѓу ромската популација и здравствените работници, за посебните потреби на ромското население во остварувањето на правото на здравствена заштита

подготовка на два типа прашалници – прашалник наменет за Ромска популација и прашалник наменет за здравствени професионалци
обука за анкетари
спроведување на анкета со 636 испитаници
спроведување на 4 фокус групи – жени Ромки, мажи Роми, претставници на ромски невладини организации и здравствени професионалци
подготовка, печатење и публикација на извештајот од истражувањето во 500 примероци.
Медиумска презентација на наодите од истражувањето
Подготовка на Стратешки документ во кој се содржани сферите на загриженост и препораки за надминување на истите, а во однос на пристапот до здравствените услуги и здравствената состојба кај Ромите. Стратешкиот документ е подготвен од страна на работна експертска група, а во него се содржат и препораките добиени на локалните отворени форуми.

3. Истражување за репродуктивното здравје во Р. Македонија

Поради недостатокот на сеопфатни студии на полето на репродуктивното здравје во Р. Македонија, се наметна како неопходна потреба да се спроведе истражување за репродуктивното здравје, кое ќе послужи како алатка да се процени што досега е направено во Република Македонија, во насока на достигнување на целите од Меѓународната конвенција за население и развој. Од друга страна, истражувањето ќе овозможи да се определат целите за унапредување на репродуктивното здравје и права. Области од интерес во ова истражување се: абортус (легален и нелегален), контрацепција, репродуктивно здравје на младите (достапност и пристапност на здравствените служби), семејното планирање и репродуктивното здравје во образованието.

Подготовка на прашалник за истражувањето;
Тридневна обука за анкетарите – формирање на истражувачки тим;
Спроведување на истражувањето – интрвјуирање на 2500 испитаници низ цела територија на Р.М.
Оддржување 10 фокус групи со општа популација
Оддржување 6 средби на работна група од 4 здравствени професионалци за анализа на податоците и комаентари
Подготовка и печатење на истражувањето во 500 примероци
Организирање 6 тркалезни маси за промоција на истражувањето